કાવ્ય : પરમહંસનું ગીત : ભાનુપ્રસાદ પંડ્યા

દેવ, આપ તો કદી શિશુની
જેમ નાચતા રહો ઉમંગે,
માએ વરસાવ્યાં હેતપ્રીતમાં
રોમ થતાં પુલકિત સૌ અંગે!
દેવ, આપનાં વિમલ નયનની
નિશદિન કરુણા વરસે,
કરી ક્ષિતિજને પાર વિશ્વમાં
વિરાટને જૈ સ્પરશે!
અનંતનો ઉદધિ છલકાતો
હરદમ ઉર-તરંગે!
બોલબોલમાં પરાવાણીનાં
પુષ્પ સદાયે મ્હેકે.
અગમનિગમની વાડીમાંથી
મોર અચાનક ગ્હેકે!
ભાનભૂલીને સકલ સુરતા
ઊપડે એના સંગે!

– ભાનુપ્રસાદ પંડ્યા