વિશ્વમાનવી : ઉમાશંકર જોષી

કીકી કરું બે નભતારલીની

ને મીટમાં માપું દિગંતરાલને,

માયાવીંધીને જળવાદળીની

અખંડ દેખું પળમાં ત્રિકાલને.

સન્ધ્યા-ઉષાની સજી પાંખજોડલી

યાત્રી બનું ઊર્ધ્વમુખી અનંતનો;

સ્વર્ગંગમાં ઝૂંકવું ચંદ્રહોડલી,

સંગી બનું વા ધૂમકેતુ-પંથનો.

વ્યક્તિત્વનાં બંધન તોડીફોડી,

વિશ્વાન્તરે પ્રાણપરાગ પાથરું;

પાંખો પ્રકાશે-તિમિરે ઝબોળી

સ્થળે સ્થળે અંતરપ્રેમ છાવરું.

વ્યક્તિ મટીને બનું વિશ્વમાનવી;

માથે ધરું ધૂળ વસુન્ધરાની.