સ્નેહાધીન, હરિ પોતે… : હરેશ ‘તથાગત’

લિખિતંગ, સ્નેહાધીન હરિ પોતે…
શબ્દોનાં મોરપીંછ સૂંઘી સૂંઘી,
ખોબો – ખેપિયાને ખારેક દીધી.
ચીતરેલી વાંસળીના સૂરેસૂરે,
કેડી ભીતર કંડારી લીધી.
…પત્ર ઉકેલ્યો, આતમની જયોતે…

લિખિતંગ –

હરિને સૂઝ્યું તે લખ્યું હરિએ,
અમને સૂઝ્યું તે અમે વાંચ્યું.
યાદ રાખીને એણે ખબરું પૂછાવી,
એ વાતે જ હૈયું હર્ષે નાચ્યું.
…દેત ઉત્તર, જો સરનામું હોતે…

                               લિખિતંગ –

સરનામું લખ્યું છે:‘ડેલી ભગતની’.
નીચે લખ્યું છે: ‘રાજકોટ મુકામે.’
કાગળ નથી આ તો સાક્ષાત્ અવસર,
જે મોકલ્યો છે મારા શ્યામે.
…હુંય ઉલ્લેખાયો: હરિની દોતે!…

                                    લિખિતંગ –

                           –હરેશ ‘તથાગત’