કાવ્ય : એંધાણી : શૈલેષ ટેવાણી

ઇશ્વર તારી એક મેં નોંધી સાવ સહેલી એંધાણી,
આ હવા જે ગાતી રહેતી ઝરમર ઝરમર જાણી જાણી.

નામ લખું તો છટકી જા તું, જાપ કરું તો ભાગે,
રીત નથી રે મુજ કને બીજી કશી સહેલી – શાણી.

ક્યાંક વળી હું ધ્યાન ધરી લઉં, ચાંક વળી હું ગાઉં,
ભરી સભાઓ ભીડ મહીંથી ખેંચી લઉં મુજને તાણી

તને ભજું તો ધૂન બની જઉં, મને મળું તો સન્નાટો,
તને શોધવા જઉં હરિ ત્યાં પગલી પગલી અણજાણી.

છતાં હશે શું એવું અહીંયાં, છતાં કહેને કોણ હશે,
આગળ આગળ થઉં મને રે ખેંચે તારી એંધાણી