કાવ્ય : બાઇ મીરાંના દિવસો

દિવસો કેમ કપાય?
અરે! આ દિવસો કેમ કપાય?
ઘડી વીતે તે વરસ સમાણી,
વરસ વીતે યુગ જાય!
છીણી છેદે અંગ અંગને,
રુધિર રંગ વહી જાય!
અરે! આ દિવસો કેમ કપાય?
દૂઝે દિનભર જખમો ઊંડા,
રાતે તાજા થાય :
કોઇ અદીઠો કર કંઇ એમાં,
લવણ મિલાવી જાય!
અરે! આ દિવસો કેમ કપાય?
સહુ વેદના મૂગી મૂગી,
વદું ન મુખથી ‘હા’!
મીરાં કે પ્રભુ ગિરિધર નાગર!
ધરશો ક્યારે બ્હાય?
મારી ધરશો ક્યારે બ્હાય?
અરે! આ દિવસો કેમ કપાય?

– રતુભાઇ દેસાઇ